كيف بنرتّب ونعرض؟

🏛️ترتيب الصالات بالبحث

الترتيب الافتراضي «الأنسب أولاً» بيمشي بهالترتيب:

1. علامة فرحة: الأعلى أول.
2. الصالات الموثّقة قبل غير الموثّقة.
3. تقييم الزوار.
4. الأحدث بالموقع.

وبتقدر تغيّر الترتيب بنفسك: الأعلى تقييماً، الأقل سعراً، الأكبر سعة، الأحدث، أو الأقرب منك.

★الصالات المميّزة (الإعلان)

فوق النتائج وبأعلى صفحات المناطق في لحد 3 خانات مكتوب عليها «مميّز». هاي إعلانات: الصالة بتدفع «ليرات» (عملة افراح الاردن)، وكل ظهور بليرة.

• الصالة المميّزة بتطلع بس إذا بتناسب بحثك (المنطقة، الفئة، الحجم).
• الخانات بتتبدّل حسب رصيد كل صالة، ونفس الصالة ما بتطلع إلك مرتين ورا بعض.
• باقي النتائج تحت الخانات عادية حسب فلترك وترتيبك: «الأرخص» يعني الأرخص.

الدفع ما بيغيّر علامة فرحة، ولا ترتيب النتائج، ولا «الأفضل هالشهر»، ولا المساهمات.

🧭علامة فرحة

فرحة بتقيّم كل صالة على 12 معيار، وكل معيار إله وزن. المعيار اللي ما بينطبق (مثلاً صالة بدون أكل) بيطلع من الحساب.

أعلى علامة من المعايير 9.4 من 10. فوقها بتنضاف +0.4 إذا الصالة «مجرّبة» (زرناها أو جرّبها حدا بنثق فيه)، و+0.2 إذا صوّرنا جولتها 360 بأنفسنا.

📋ملف الصالة عند فرحة

هاد مش تقييم، هاد قديش بنعرف عن الصالة. كل ما زادت معلوماتها (الأسعار، القاعات، المواقف، الصور…) بتطلع درجتها:

• معلومات أولية: أقل من 60٪.
• معلومات أساسية: من 60٪.
• معلومات جيدة: من 70٪.
• شبه كاملة: من 80٪.
• مكتملة: من 90٪.

🏆الأفضل هالشهر

بيتحدّث أول كل شهر لكل الأردن ولكل محافظة، بمعادلة واحدة بدون إعلانات:

التقييم بينحسب مع تصحيح للصالات قليلة المراجعات، عشان صالة فيها 3 تقييمات بـ5 نجوم ما تسبق صالة فيها مئات التقييمات. وبنعرض بالترتيب المحافظات اللي فيها 3 صالات وأكثر بس.

♥الإعجابات

«أعجبني» للأعضاء المسجّلين بس، وبتقدر تشوف مين أعجبهم وتفتح بروفايلاتهم.

الإعجابات بتأثر شوي على معيار «صيت الصالة» بس: لحد 15٪ من هالمعيار، وما بتبلش تحسب إلا من 5 إعجابات. هيك ما حدا بيقدر يرفع صالة بالإعجابات لحالها.

💬المساهمات

• العادية: نجوم + كلمات جاهزة أو كلام (من 40 حرف إذا بدون كلمات جاهزة). بتنزل باسمك بعد فحص سريع.
• المميّزة ✦: أسئلة فرحة عن الصالة، وبتدخل بتقييم المعايير، وإلها نقاط أكثر.
• صاحب الصالة ما بيقدر يساهم عن صالته، وفي حد يومي لكل عضو.

📸المزودين

1. المزودين المميّزين (مدفوع، مع علامة) أول.
2. التقييم مضروب بعدد التقييمات، عشان التقييم الكثير بيوزن أكثر.
3. اكتمال الملف.

🏷️العروض

العروض بيضيفها أصحابها مباشرة. بنرتبها: اللي بيخلص أقرب أول، وبعدين الأحدث. العرض بينشال لحاله لما يخلص تاريخه، وتأكد دايماً من الشروط مع صاحب العرض.

🧮حاسبة العرس

كل بند بيبلش بتقدير، وبيتحوّل لحاله لأسعار حقيقية من الموقع لما يصير في 10 أسعار وأكثر بالمحافظة. العشاء (بوفيه مفتوح) اختياري، إلا إذا الصالة حاطّته ضمن سعر الحجز. و«اطلب سعر» بيبعت رسالة من رقمك إنت للمزود على الواتساب.